Sep 18, 2018

Møðgutúrur- hittast á hálvari leið

Vit fóru úr Føroyum, og Frida S. fór úr Brússel, so hittust vit á flogvøllinum í Edinburgh. Deiligt at síggjast eisini millum summar og jól. Vit høvdu eina íbúð mitt í býnum og vóru úti allan dagin hesar dagarnar. Turið hevur stutt síðani verið í Edinburgh, so hon var ferðaleiðari.
Tað er ein hugnaligur býur, men so sera litleysur, næstan øll hús eru bara ómálað grót, hugsaði at kanska er tað als ikki loyvt at mála húsini?



okkurt undantak er kortini
Vit vóru og hugdu at tinghúsinum, Holyrood í Holyrood lundini. Tað var ein stuttligt og áhugavert upplivilsi. Har var alt lagt til rættis til vitjandi, vit sóu nevndarrúm og tingsalin og eina framsýning um tingið og tingarbeiðið. Kanska Løgtingið kundi havt okkurt tílíkt, bæði til ferðafólk og føroyingar, kanska næmingar. Havi eina ferð verið túr í løgtinginum við ferðaleiðara, tað var eisini áhugavert.

lutfallið millum SNP (tað gula) og hini

nevndarrúm
Edinburgh Castle, elsti parturin St. Margaret's Chapel er frá 1100 talinum

Tinghúsið er bygt í 2004, Skotland fekk heimastýri í 1999



Vit ótu so - so segði hann - allar máltíðir á ymsum matstovum. Pubb er tað besta, vit ótu als ikki "fínt" - fish n' chips, indiskan lambsrætt og ein høsnakjøtsrætt "pie of the day". Vit búðu sera høgliga fyri til at fara í handlar og  ganga niðan á slottið.
Men vit tóku eisini ein bussrundtúr, og tá fóru eg og FS umborð á Brittania, hon liggur sum museum har í Firth of Forth.

Sep 10, 2018

Kvøldskúlin aftur í gongd

Føroyskt sum fremmandamál fer í gongd fyrr enn hini skeiðini um heystið. Í ár gera vit eitt sindur øðrvísi, tí vit høvdu møguleika at býta byrjanarflokkin sundur í tveir bólkar eftir førleika. Vit gjørdu eina støðiskanning og mettu síðani um, hvør hóskaði best til allar-allar fyrsta støðið A1, og hvør mundi fáa meiri burtur úr einum eitt lítið sindur hægri støði A2.  Hin lærarin er Alina Jespersen, hon er Meistari í lingvistikki, dugir væl føroyskt og hevur royndir av júst hesi undirvísing úr Týsklandi. Stutt sagt ein funnin fressur!

Vit eru sostatt farin undir at tillaga okkara undirvísing í FFM til CEFR krøvini - tað er evropisku sundurbýtingina eftir førleika. Í summar keypti eg nakrar skúlabøkur til hesa undirvísing, sum tey brúka í Noreg. Ein tekstabók og ein uppgávubók til hvørt stigi.


A1 
 Bøkurnar kalla lærugreinina "norsk og samfunnskunnskap", og vit síggja, at Noreg er alla tíðina annar tráðurin.
A1
A1



A2

B1

B2

Alina og Bergljót, lærarar

 Sera áhugavert at síggja, hvørji evni tey velja, og hvussu progressiónin er. Tíbetur síggi eg, at mín byrjanarbók VÆLKOMIN líkist hesum frálíku bókum, tó als ikki í øllum og als ikki í myndatilfarinum. Hesar norsku eiga at vera nakað dýrar at framleiða, hugsi eg. 






Sep 1, 2018

MÁÁÁÁL !!!

Havi verið til heilar tvær norðurlendskar ráðstevnur um mál seinastu vikuna. Tann fyrra var ein NVL ráðstevna, sum Karolina Matras hevði fyrireikað vegna føroyingar. Hon varð hildin á Bacalao. Evnið var byrjanarundirvísing til tilflytarar, undirvísing í "literacy" og "numeracy", tað er so mikið av lesing, skriving og rokning, at tú klárar teg í gerandisdegnum.


Vit hoyrdu um, hvussu tey gera í hinum londunum, krøv til tilflytarar og samarbeiði við arbeiðspláss osfr. Tað er fyrstu ferð eg havi verið inni í teimum nýggju hølunum í Sjóvinnuhúsinum, og tann rundi fyrilestrarsalurin er óføra vakur, haldi eg. Sera positivt við fundinum var, at Vár í Ólavsstovu kendi seg kallaða at stovna ein bólk, sum skal gera uppskot til eitt fak ella part av faki á Læraraskúlanum, sum er "føroyskt sum fremmandamál", og tað verður gott, at vit fáa meiri fakligan førleika inn á hesum øki.
Hin ráðstevnan var skipað av Málráðnum við Mariusi og Sólvá á odda. Tað var tann árligi málfundurin hjá teimum norðurlendsku málnevndunum. Hon var hildin á Hotel Føroyum og vardi tveir dagar. Evnið var "Málið í sosialu miðlunum". Eini fimm-seks fyrilestrar um málið á internetinum, sms, kjatt, telduspøl og ráðgeving. Spurningar sum: ávirkar kjattmálið gerandismálið hjá teimum ungu, hvussu verður enskt brúkt, meðan tey ungu spæla "Counter Strike. Global Offensive" ella sæst aftur í skúlaarbeiði teirra ungu, at tey brúka nógv teldusamskifti? Eitt dømi var, at tey skriva år100 í staðin fyri århundrede, men niðurstøðan var, at tey ungu skilja væl ímillum, hvussu tey skriva til hvørt annað á netinum, og hvussu ein eigur at skriva, tá ið ein skal hava karakter fyri tað.
Sum sæst niðanfyri er nógv ensk orð í hesi samrøðu, men tey hava norskar bendingarendingar.
Áhugaverd ráðstevna, men rættiliga nørdasligt, men granskarar skula ivaleyst vera nørdar. Onkur granskar t.d. hvussu teknsetingin er í sms boðum, ella nær vit brúka hashtag, gif og emotikon í okkara samskifti.

Í dag var eg í Riti og ráki, eg hevði Kristinu við mær, sum er 4 ár. Kristina vil fegin læra bæði bókstavir og tøl, og hon brellaðist illa eftir hesum litføgru bókum, sum eru til sølu, nú ið vit hava eitt ár sum eitur "árið fyri málmenning barna".....ha, hoyrdi eg rætt???


Og tað vóru ikki bara fýra slíkar bøkur, men einar 10-15 , hvør litfagari enn onnur. Føroyskt bókstavarað? Nei tú! ABC leg, og hesar bøkur eru til smábørn, ikki til 3. flokk byrjanarundirvísing í donskum!

Aug 19, 2018

Anthony Doerr: Noget om Grace (About Grace 2004)




Eg keypti hesa bókina, tí at  "All the Light We Cannot See", sum vit lósu her fyri í Bókastevi var so forbiðið góð, tí kendi eg høvundsnavnið aftur. Og eg varð ikki svikin. Hendan bókin er eisini sera góð, summir partar líkjast kanska yrkisteksti, tí høvundurin hevur so stóran áhuga í evninum og hevur gjørt so dygdargott heimaarbeiði, m.a. við bókini hjá W.A.Bentley niðanfyri, sum í søguni var í barnaheiminum hjá høvuðspersóninum. Hon lá á hillini undir sofaborðinum.


SØGAN
David Winkler er sanndroymdur og hevur kanska autismu ella forfylgisisvanvid. Men sum bókin líður skilja vit væl hansara ørskap, sum byggir á hansara ræðuligu marrur. Hann arbeiðir sum veðurmaður, og hansara serfrøði er hydrologi, læran um vatn. Hann upplivir eina ræðuliga vatnflóð í dreymi, dóttirin druknar, og tað er hansara skyld. Av tí sama rýmir hann frá konu og barni fyri at bjarga dóttrini undan hesum hendingum. Fyri at broyta framtíðina, eitt motiv ella ein gáta, sum ert ofta viðgjørt í teksti og filmi. Hendingar ganga fyri seg í Amerika, Alaska og á Grenadinunum í Karibiska havinum. Øll søgan er um, at honum leingist eftir konu og barni, og tað er ein svár eksistensialistisk trá og leitan.

STÍLUR
Tað mest hugfangandi við skaldsøguni er detaljustýrdi, sansaligi skrivihátturin. Tað er, sum teksturin verður til undir sjóneyku, minnir um tekningarnar hjá Astrid Andreasen, sum júst hava verið sýndar fram. David Winkler er vatnfrøðingur, og hansara lívs- og tíðaráskoðan, angist og vón eru allar tvinnaðar saman við vatndropans undurverk og megi
...at havet var et enormt opbevaringssted, hvordan vandet i os længes efter at vende tilbage til havet, og når det endelig er i havet, længes det efter at stige op i skyerne, og i skyerne efter at falde ned på jorden. (s. 390)
og kavaflykrunnar ævigu mynstur og endurtøkur
Iskrystallens uendeligt mange permutationer, alt gentager sig selv, men faktisk, set fra en anden vinkel, gentager intet sig selv. Armene vokser ud, former dendritter og flader, hver gang de samme vinkler, men det endelige produkt - på grund af vinden på grund af den molekylære vibration, på grund af hastigheden, hvormed de vokser, og på grund af temperaturen - er aldrig det samme. Til en vis grad var tiden formbar, hvad han gjorde, havde en betydning. (s. 418)
Smágentan Naaliyah verður sum vaksin hansara sálarvinur, og hann hjálpir henni at gerast granskari, hon granskar skordýr og flugur av øllum slag, aftur sjóneykuskriving
"De gnaver træet i stykker indefra og ud" hviskede Naaliyah, og han lyttede til billelarverne dybt inde i træstammen, der spyttede deres syre på veddet for derefter at tage det i munden og findele det, gravede deres mørke veje op mod grenene.....(s. 392)
Menniskjað er ikki harri, vatn í ymsum formi ræður, og langt aftaná at menniskjuni eru horvin, er vatnið.






Aug 11, 2018

Filmurin Book Club

Hann gongur í Havnar bio. Onkur segði mær frá, at eg mátti farið við bókaklubbanum hjá mær. Eg hugsaði beinanvegin um filmin "The Guernsey Literary and Potato Peel Society" , sum eisini er um ein bókaklubb. Jú eg bestilti bilettir og borð á Hvonn. Eg sigi bara beinanvegin, at tað besta við kvøldinum var Hvonn og at gleða seg at sleppa í biograf.
Filmurin var um 4 eldri damur, ja í okkara aldri, sum fóru at lesa Fifty Shades of Grey. Kanska mær hevði dámt filmin betur, um eg hevði havt lisið bókina. Men filmurin var ikki filmatisering av Fifty Shades og Grey, sum onkur helt. Annars er Fifty Shades of Grey filmatiserað (2015) og vann 1. pláss í "vánaligasti filmur" bólkinum.

Men eg havi altíð fylgt Diane Keaton og Jane Fonda líkasum, og tær hava eisini spælt stuttligar filmar. Men hesin var bara býttur, tann triðja var Candice Bergen. Well, filmurin er sum sagt um tríggjar damur - einkja, fráskild og gift, sum hava ein bókaklubb. Og tær eru sera upptiknar av sínum aldri og tí dalandi sexlívi, sum hann hevur ført við sær. Tær fáa so íblástur av hesi erotisku frásøgn at fara at royna seg. Sumt var stuttligt, men tað nógva var bara gnisandi fjákut. Men, men rætt skal vera rætt, eg fór heim í steðginum.Kanska eg eri blivin so piparslig. Men vit flentu nógv.

Tað besta við kvøldinum var at hitta mínar bókavinkur, og tað var ikki keðiligt.

Hjartans takk fyri eitt deiligt kvøld, gleði meg til næstu ferð.

Aug 8, 2018

Gjógv ein summardag

Vit fóru norð leygardag og ætlaðu okkum til gudstænastuna í gjónni. Ein so fín brúgv er komin at liggja í dansistovutúninum, skal kanska koma í staðin fyri brúnna omanfyri Lítlafløtt, sum kortini sær út til at vera fín. Sama slag brúgv, sum ein sær ymsastaðni í Havn.
Vit fóru ein túr í Gjáargarð, har er lívligt og liviligt á sumri. Tey hava umskipað matstovuna, so at hon er nógv ljósari og rúmari. Tey selja forkunnug postkort, vit tosaðu eitt sindur um, hvør henda kona, sum situr og mjólkar man vera, og um tað er loyvt at taka eina gamla mynd og gera til postkort, einki stóð á kortinum um, hvør hon var, ella hvar myndin var tikin. 















Síðani gerkk leiðin niðan á Nasa, fitt av ferðafólki var á ferð. Og sjálvandi var ferðavinna okkara samtalsevni. Tað var gott geingi og turt, vit fóru ikki út um gjaldsportrið. Hugsi bara : púra beint! í hvussu er, til politikarar hava funnið útav at lata útøkini fáa sín part av tí nógv umrødda inntøkuvøkstrinum í ferðavinnuni.

Hopi tey fáa nokk pengar til at gera gøtuna betri og stikið meira trygt.
tey standa við gjaldsportrið

her hava ferðafólk traðkað eina gøtu uttan fyri stikið

hegnpelin er púra leysur í holinum, flytur seg einar 10-20 cm

Sporini niðan á Egg
Gudstænastan var væl vitjað, prestur hevði fingi skjúts til Gjáar. Teatur við teatralskum presti. Temað var umhvørvi, bæði í prædiku og sálmum.

Skjútsbáturin kemur


Jul 31, 2018

Ólavsøkan 2018

Vundnir leggir

 Eg hevði ætlað mær at vera í Dali á ólavsøku, men eg veit ikki, tær bóðu meg verða í Havn, og so sat eg barnagenta ólavsøkuaftan. Eg hevði okkurt, sum eg vildi uppliva m.a. setanina og fólkafundin á háskúlanum. Tað lukkaðist, men eg fekk ikki upp í lag at fara út á Doktaragrund á tann fólkafundin.
Vit vóru í Faroe Pride gonguni, Leyvoy er eisini har, hóast hon sæst ikki. Ólavsøkuaftan vóru vit uppi hjá Annu Mariu, tøkk fái hon og Jákup, at tey buðu allari familjuni til eina máltíð. Tað var stuttligt at síggja so mong. Myndir eru ikki av øllum, tíverri.
Frida S, Herbert, Madeleine, Kristina og Magna
Aron og Eli Sigurð
Sigri og Eve
Kitty og Turið


Tóki og genta hansara

Bergljót

Frida Sofia og Turið




Leyvoy og Sølvi
Sigri, Sigrið, Sølvi og Leyvoy



Sigurð og Silja
Jonas og Laura
Sølvi og Kitty
Marja
Ragnar

























Summi av teimum, sum ikki vóru hjá Onnu Mariu, sóu vit í býnum, her hitta vit Tórð, Ruby og Olnu Birgit



Her sæst Herbert í skrúðgonguni, hann leiðir Kristinu, men tíverri sæst hon ikki. Magna var eisini so skjót framvið, at eg fekk ikki mynd av henni.

Clara skal fáa tað síðsta upp á pláss.



Tað fyrsta er farið av lagi, árenn tað síðsta er fingið upp á pláss.

Sama ger, hugnaligt er



systkinabørn




 Frida S. saman við trímenningi sínum Eyðvør og dóttur hennara Arnu.

Likkurnar hava kátt sítt lív