May 23, 2017

Útvarp Føroya - kumusta ka?

Kanska tíðin er komin nú til, at útvarpið viðurkennir okkara nýggja samleika? Tað er so inn at fáa sær ein nýggjan samleika, sum um mann bara kann lata seg úr einum samleika!
Mercy, Antonette, Bergljót, Alina, Michelle

Men okkara føroyski samleiki er broyttur og broytist alla tíðina. Nú er ein stórur partur av fólkinum, sum hevur annað móðurmál enn føroyskt. Útvarp Føroya eigur at spegla tann veruleikan. Tíðindi uttan úr heimi skuldu eisini skeitt at listanum hjá útlendingastovuni, sum vísir, hvaðani tilflytarar koma. Hugsa tær, ein stór hending er í tínum landi, og eingin av tínum grannum, vinum ella starvfeløgum ána tað? Vanligt er at Útvarpið sigur, um ólukkur og annað eru úti í heimi: ongin føroyingur er har á leiðini, ella: eingin danskari osfr. Men nógvir tilflytarar kunna hava fólk "har á leiðini", familju, vinir, børn osfr.
Útvarpið kundi gott givið sítt íkast eisini til integratión við at havt eina sending á enskum um vikuna! Tað kundi verið ein samandráttur av tíðindunum ta vikuna. Tað hava tey gjørt fyrr fyri turistar, so mikið meira neyðugt fyri íbúgvar í landinum.
Michelle, Winda, Hilda, Toni, Khirvie, Annette, Jelena, Betsy, Gie, Natasha

Hugsi, vit skuldu havt eina sending um mánaðin í útvarpinum - ella um vikuna til útlendingar, sum eru fluttir til Føroya. Sendingin skuldi verið á føroyskum, enskum, tagalog, teilendskum, russiskum, sumt kundi blivið tulkað so hvørt. Sendingin skuldi blivið gjørd av tilflytarum (gestavertur úr Teilandi, Filipsoyggjum, Ukreina), um tilflytarar og til tilflytarar. Nógv ymiskt kundi verið tikið upp í slíkari sending - og ikki bara trupulleikar!

Evni:
1. Vitja um landið (Túr við Tórði fyri tilflytarar)
2. Hvar arbeiða tilflytarar?
3. Hvar ballast tey?
4. Hátíðarhalda teirra "dagar" og høgtíðir.
5. Vitja Mariukirkjuna.
6. Vitja kvøldskúlar um landið, tosa við tey um málundirvísing.
7. Børnini, hvussu klára tey seg í skúlanum, eru tey tulkar fyri mammuna?
8. Føðingardagar og ferðing.
9. Postkassi, tilflytarar kunna skriva inn (á enskum ella sínum egna máli, um tey vilja tað) og fáa svar frá: lækna, sosialráðgeva, lærara.
10. 5 minuttir av mállæru fyri útlendingar.
11. Tulkatænasta  osfr. osfr.

Týdningarmikið at hava nóg mikið av stuttligum, positivum innsløgum. Týdningarmikið, at tilflytarar sjálvi stýra sendingini.
Sum er, er eingin tilelving hjá tilflytarum at lurta eftir útvarpinum, sum annars hevði verið ein fínur máti at lært seg meira føroyskt. Útvarp Føroya eigur at vera partur av integratiónini - tí nógv umrøddu!


Frá vinstru: Jenny Filipsoyggjar, Bunmi Nigeria, Nadia Teiland, Antony Frankaríki, Yolanda Filipsoyggjar, Feng Kina, Mel Filipsoyggjar, Patricia Peru. Antony heldur talu, næmingarnir bjóða lærara og starvsfólki buffet.
Her niðast seti eg bingovinnarar í dag 23. mai Feng og Jenny:



May 17, 2017

Spitsbergen á Eiði

Tað var rættiliga kalt, tá ið Spitsbergen legði at á Eiði í morgun. Stuttligt at síggja eitt skip hjá Hurtigruten við kei í Føroyum. Hurtigruten fram við Noregsstrond hevur leingi staðið ovast á ynskilistanum. Nú vænti eg, at eg og Inga Rósa fara um eitt ár, um heilsan verður.
Men í dag er 17. mai, so eingin kom í land, fyrr enn tey høvdu hátíðarhildið tjóðardagin umborð. Tey gingu skrúðgongu umborð, tað var sjáldsamt, tí teinurin var ikki so langur har á ovasta dekki, so tey gingu nakrar ferðir runt. Á odda gingu yvirmenninir í fullum uniformi.


Sera lítið av fólki var og tók ímóti. Bygdarráðsformaðurin var tó til staðar og fór umborð. Tá ið fólkið kom í land, stóð bussur við ferðaleiðara fyri teimum, og har fóru kanska 20-30 fólk. Ætlanin var at fara á rættina at hyggja at seyði. Sum eg skuilti, skuldu eisini gerast ein gongutúrur av Skarðinum.


May 14, 2017

Sunnudagstúrur



Vit fóru úr Havn um eitttíðina. Sólveig, Laura og eg. Vit fóru norður til Klaksvíkar. Fyrsta stoppið var hjá Fríðu, sum vit hava hoyrt so nógv gott um. Har er stak hugnaligt, og kaffið smakkar væl. Vit sótu og bíðaðu eina rúma tíð, eg haldi tað tók eini trý korter at fáa matin. Men tapas borðiskurin smakkaði stak væl skal sigast!
Nú fóru vit at hyggja eftir Nólsoyar Páls verkætlanini, sera spennandi verkætlan, fleiri hús og so hetta flotta neystið.
Men sjálvandi Klaksvík er ein býur, og býarrúmið er í støðugari broyting, ikki alt til tað betra, siga summi. Hesin íbúðarbygningurin stendur rættiliga dominerandi her á sandinum.
Nú gekk leiðin í gamla seglhúsið til listaframsýning hjá Paturson feðgunum.

Flott hús og væl restaurerað. Vit síggja Lauru og Sólveig í ultramarinum ljósi, og Símun í Uppistovu var blíður og týður. Á suðurleiðini stukku vit inn á gólvið hjá Súsannu og Salamon í Gøtu. Deiligur túrur.
























Mynd hjá Jastrid Og Símun Gullaksen

May 9, 2017

Tveir vitar



Hátíðarhald var í Prestlág í dag. Listarverkið Tveir vitar eftir íslendingin Jón Sigurpálsson varð í dag handað Føroya fólki. Eitt umboð fyri Ísafjørð og eitt umboð fyri Súðavík hildu talu. Sera rørandi og kenslubornar talur, sum løgdu dent á samhuga og kærleika millum tjóðirnar.

Fýra menn úr Havnar hororkestri spældu, fyrst Eg skar mítt navn, og at enda Abide with me. Sera hátíðarligt.

Annika Olsen tók ímóti listarverkinum og helt eina talu, og varaløgnaður Høgni Hoydal helt eina talu eisini.








May 6, 2017

Í føðingadag hjá Róa

Henda vælsignaða sólskinsdag var morgunmatur í boði uppi í Brøttulíð. Deiligt at síggja nógv av familjuni. Stuttligt at síggja Andrias,
Lítla Ranja sat so fitt á køksgólvinum.
Føðingardagsbarnið - nú tannáringur - saman við skyldfólki.
Og úti á altanini var deiliga heitt.















May 1, 2017

Issen tåler ikki tryk - sjey ár seinni

Tey plaga at siga, at í hjúnalag kemur ein kreppa eftir 7 ár, 7 ára kreppan. Kanska tað sama er galdandi fyri einkjur? Sjey ára kreppa? Síðani á páskum havi eg følt meg so syrgna, einsamalla. Tað er ikki tí, at eg ikki havi familju og vinir, skal eg skunda mær at siga. Men ongin og onki kann fylla plássið hjá einum lívsfelaga. Tað samlív upp á gott og ilt, sum tit høvdu. Nú fert tú heim til tíni tómu hús, ja tómu íbúð hvønn dag og hvørt kvøld og hvørja nátt. Um náttina koma tankar á teg, die Gedanken sind frei, ja tað er ikki tí so væl! 
Hvørja ferð koddin ella høvdalagið trýstir inn á skallan á mær, hoyri eg hansara rødd, tað er sum at trýsta á ein knapp. Koddin skal vera undir nakkanum, ikki inn ímóti høvuðskálini. Tað var í fyrstani, vit vóru komin saman. Einaferð vit eru   í songini og hirsa okkum upp pláss, nú trýstir hesin vanlukku koddin inn á høvdið á mær, og eg sigi, at hann skal vera undir nakkanum, annars fái eg høvuðpínu. Tá segði Hans Marius: Issen tåler ikke tryk. Eg helt, tað var undarligt at siga. Hann arbeiddi á verkstað við nógvum eykalutum, sum komu úr DK, kanska hevur tað staðið á pakkunum, forsendelsen tåler ikke tryk..men issen...deiliga gamaldags orð. Eg vildi ynskt, at eg mintist fleiri fittar, merkiligar ella klókar setningar, eg vildi ynskt, at eg mintist betur.

Tað er ikki tað, at eg siti inni og stúri altíð, eg ferðist og arbeiði osfr. Men tey, sum er ferðist saman við og tey, sum eg arbeiði saman við, eru næstan altíð tvey og tvey. Alt samfelagið er gearað til pør. Eg blívi bara so avindsjúk, tá ið eg síggi pør í minum aldri fara leiðandi. Øll hava onkran. Mín innara issa er undir trýsti haldi eg. 

 Hetta er skriviterapi, kanska tað fæst burtur av bróstinum, úr hálsinum og av skallanum. Spurningurin er, um skriviterapi riggar eins væl, um tú skrivar til skuffuna, sum tá ið tú skrivar til bloggin?
Tað var heitt henda dagin, tú sovnaði uttanfyri við Gjógv, einki trýstir á skallan her, hann liggur heilt úti í luftini. Tað var kalt í kirkjugarðinum í gjár, nakrar tulipanir standa og treiskast á grøvini, hálvgum avsvidnar av kulda.
Vit høvdu vassað í teirri ísakøldu ánni í Dali.


Apr 26, 2017

Marokko 7-17 apríl 2017 (6)

Tað er fyrstu ferð, eg havi verið í einum muslimskum landi, og eg má siga, at religiónin setti sín dám á gerandisdagin har. Men sjálvandi uppliva tey, sum eru barnvaksin har tað ikki so. Bønarkallið hvønn morgun, tá ið sólin fer upp, er tað fyrsta ein hugsar um, tað hoyra tey kanska slett ikki. Ein moska var granni hjá okkum einar tvær ferðir á ferðini, tað var ein sjáldson uppliving.



Salle de priere Femme.
Bønarrúm til kvinnur.















LAccess n'est pas permisaunt non musulman.
Eingin atgongd fyri ikki muslimar.


Klædnadraktin hjá kvinnum vísir eisini, um kvinnan (ella maður hennara) er sera ávirkað av islamskari lóg ella sær djellaba sum eitt mentanarligt fyribrigdi, sum er í broyting.
Tá ið tú fert út at eta, ber ikki til at keypa vín aftur við matinum, jú onkunstaðni m.a. Restaurant le Marrakchi á Fna plássinum, men har var so eisini búkdansur. Ein gullklædd sveiggjaði við endanum, og ein silvurklædd kom við livandi ljósum á høvdinum og dansaði við sær sjálvari. Tveir menn spældu tónleik aftur við matinum.



Maturin á le Marrakchi var sera leskiligur, fyrst fingu vit 9 smáar skálir við ymsum smáum rættum, sera leskiligt.

 

Maturin á hesi matstovuni var lekkur, forrætturin var 9 ymiskir rættir við breyði afturvið, og taginan var fínt laðað sum ein pyramida.
Eitt kvøldið ótu vit við síðuna av eini mosku, t´+a ið bønartíð var, var so fult inni, at menninir løgdu seg í fínum rekkjum uttanfyri á vegnum.