Ein persónur troðkar seg fram. Tað er ein kvinna í svørtum frakka við belti um miðjuna. Frakkin er ov heitur til hesa ársins tíð, tað mai mánaður, og sólin skínur. Menhon sær ikki heit út, ber høvdið høgt, hárið er jarpt við nátúrligum falli, røkkur niður á herðarnar. Hon gongur við føstum fetum gjøgnum býin, kroppurin er langur og upprættur. Hon gongur gjøgnum býin, at enda steðgar hon við eini hús, úthurðin er blá, ikki nýmálað, men fagurt blá. Konan lyftir høgru hond og skal banka uppá, men so steðgar rørslan, og hondin dettur niður við liðini. Kvinnan bakkar tvey fet burtur frá hurðini, í somu løtu fer hurðin upp, og eitt bleikt kvinnuandlit kemur til sjóndar, hon er so bleik, at holdið rennur saman við ta illdámaðu skjúrtuna, hon er í. Hon stígur eitt fet fram, og samstundis stígur hin svartklædda eitt fet aftur, sum ein pallsettur dansur, nú stígur hin hvíta eitt fet aftur og hin svarta eitt fet fram, meðan hon lyftir høgru hond. .........nú fall teppið, og eg sá ikki meir.
------------------
Hvørjar vóru tær, vóru tær systrar, ella móðir og dóttir, og hvør teirr var so mamman? ella mágkonur, kanska vóru tær par? Spennandi at frætt.
No comments:
Post a Comment