Norwegian Wood eftir Haruki Murakami

Endiliga fekk eg upp í lag at lesa hesa bókin. Eg havi fyrr lisið Tá ið eg tosi um at renna í týðing eftir Paula Nielsen. Japanarin Haruki Murakami var á hvørjum munni fyri nøkrum árum síðani, og eg hugsaði eg, hann má eg lesa, hann er so kendur. Soleiðis hevur ommusonurin nokk eisini hugsað, tí í 2018 fekk eg hana í jólagávu frá Louis.

Murakami er umsettur til eini 40 mál, og hevur fingið nógvar virðislønir. Hann er føddur í 1949, so vit eru javngomul. Og umhvørvið hann skrivar um er studentaumhvørvið í Tokyo, tá ið hann var 18-19 ár. Høvuðspersónurin Toru Watanabe býr í studentabústað, hann er á tveymanskamari saman við "Storm Trooper". Tað hendir sera lítið í hesum umhvørvi, hann fer til tímar á universitetinum, vit hoyra einki um undirvísingina. Hann fer í býin, oftast saman við konufólkarevinum Nagasawa. Hann gongur á barrir, tað tykist sum hann drekkur sera nógv, umleið hvørt vikuskifti pluss tað leysa. 

Nagasawa er ríkur, hann er nihilistur, hann er forlovaður, men trolar eftir øðrum og fer í song við øðrum alla tíðina. Totalt uttan moral, og hann útvegar Toru gentur eisini.

Men tað sum bókin snýr seg um er Torusa samband við gentur, Naoko, Midori, Reiko, og hansara kynslív. Fyrst av øllum við Naoko, teirra samband byggir á vinarlag teirra við Kizuki, sum var sjeikurin hjá Naoko. Men hann er deyður. Hann tók lívið av sær, og tað er torført hjá teimum at koma til sættis við.  Sjálvmorðstøl í Japan eru serstakliga høg, og bókin hevur fleiri dømi um sjálvmorð. 

Naoko fer á eitt sanatorium fyri sálarsjúk, har hon býr saman við Reiko, næstan sum í klostri. Tá ið Toru fer at vitja Naoko, vitjar hann báðar og fær eitt sera tætt samband við báðar, intellektuelt fyrst og fremst, tað eru avbjóðingar við sex, so tað verður sum oftast til hond- ella munnarbeiði

Heitið Norwegian Wood er sera fangandi hjá okkum, sum elska Beatles. Tað er Reiko, sum spælir sangin fyri Naoko. Sangurin endar á gátuføran kanska óhugnaligan hátt.

Men teksturin er so glíðand vakur (á enskum), vil serliga nevna lýsingarnar av náttúruni, tá ið Toru fer at vitja Noko. Sanatoriið er langt frá alfarveg, hugsi hann hevur gott áræði at fara við toki, bussi og til gongu við ryggsekki.   

Eg veit ikki, eg havi kaska ikki skilt boðskapin ella skriviháttin ella okkurt, men eg dugi ikki at síggja, hví  hetta er blivið ein slít kulkbók. Kanska vissi eg hevði lisið hana í 1987, tá ið hon kom út.

Býflugusøgan (Bienes historie) eftir Maju Lunde

Evnið er sera aktuelt og nógv umrøtt, bókin er frá 2016, høvundurin er norska Maja Lunde. Eg lænti hana frá Gudny, tá íð vit vóru og vitjaðu hana á Drangsnesi. Eg las haana í íslendskari týðing eftir Ingunn Ásdísardóttur. Maja Lunde hevur skrivað, ella er í ferð við at skriva eitt fýrabindsverk um vistfrøðiligu støðuna í heiminum. 

Í bókini "Býflugusøgan" eru tríggjar søgur um tríggjar familjur. Tær liva í hvør síni tíð og stað: 2098 í Kina, 1960 unum í Amerika og 1858 í Onglandi. Felagsnevnarin er býflugurnar. Familjurnar eru líkar, hava børn og arbeiða við býflugum ella gera arbeiðið hjá býflugum. Men tær eru eisini ólíkar. 

William í Onglandi hevur 8 børn, av teimum er bert ein drongur, og hann vil einki hava við býfluguuppfinningarnar hjá pápanum at gera. Pápin vil sjálvandi, at drongurin skal hava áhuga, tað vísir seg so, at ein av gentunum hevur áhuga fyri tí, sum pápin ger. Pápin hevur uppfunnið eitt nýtt slag av býflugubøli (tað vísir seg so, at tað longu er uppfunnið), og vit síggja , hvussu fegin hann er, tá ið prototýpan er liðug.

George í Ohio, USA í 2007 er býflugubóndi og hevurnógv modernað býflugubøli, sum hann passa og heldur so sera væl.  Tað er hesa tíðina, at stórar vanlukkur raka býflugurnar í heiminum. Sjúkur raka, og veðurlagið broytist. Býflugubøndur byrja at leiga sínar býflugur út til frukt- og berjaplantasjur, tí at tað mangla flugur til at dusta blómurnar. George koyrir langa leið við býflugunum og fær so løn fyri flugur pr. m2.  George og konan hava bara eitt barn ein son, og hann vil heldur vera rithøvundur enn at halda býflugur.

Tao og maðurin hava bara eitt barn, hann er 5 ár. Tey bæði arbeiða sum honddustarar, ongar býflugur eru til, og frukttrøini verða dustað við hond. Arbeiðsfólkið klívur upp í trøini og penslar hvørja einstaka blómu. Mamman gekk í skúla , til hon var 15, men nú byrja børnini at arbeiða 9 ára gomul. Tao vil gera alt , fyri at sonurin skal fáa eitt betri lív. Samfelagið er sera kúgandi og dapurt, ein dag um vikuna hava tey frí, tey fara útferð við matpakka, og okkurt hendir, so at drongurin gerst øgiliga sjúkur. Hann verður flogin til Bejing, og mamman og pápin frætta einki. Myndugleikarnir kanna hann, og lesarin hugsar: ein sótt, ein heimsfarsótt. Tao fer til Bejing, og vit síggja , hvussu alt er forfallið og fátæksligt.

Bókin er sera fangandi, ein modernað dystopi. Ein alt ov realistist dystopi. Skuldi verið skyldulesnaður í framhaldsdeild og universitetum.

Ísland - 6

Kirkjur

Kirkjan á Hrafnsnesi hevði hesar petroleumslampurnar, sum beinanvegin minna á tær aldargomlu lampurnar í Dals kirkju, sum tó eru gjørdar til el-lampur.

Neskirkja er beint við hjá Ingu Rósu. so tað var so líkatil, at vit fóru í kirkju sunnudagin, áðrenn vit fóru heim. Neskirkja er friðað uttan, hon er eftir Ágúst Pálsson og er frá 1957. Prestur var Skúli Sigurður Ólafsson. Prædikan var góð, faklig og modernað. Hann hevði einki handrit, brúkti ikki prædikustólim, men hevði gott samband við áhoyrarnar. Byrjaði við egnari uppliving í Svøríki um orðið vápnahús, fór longur til Nóa ørk, kirkjuskipið og kvøldveitsluna, har nógv vóru boðin og ikki komu. Sera viðkomandi, tí í kirkjuni vóru 17 fólk, hon tók eini 300. Urguspælarin var í feriu, so prestur sang sjálvur fyri a capella.

Skúli Sigurður Ólafsson

Hallgrímskirkjan er altíð eina vitjan verd, og henda dagin var serlig samhugaframsýning framman fyri altarið.

List

Vit vitjaðu nakrar framsýningar. Fyrst er at nevna Kjarvalsstaðir. Har vóru tvær sýningar : Andlit úr skýum eftir Kjarval og Spor og thræðrir við ymsum listafólkum. Hetta seinna vóru seymaðar og broderaðar myndir. Sersakliga merkiligt og originalt var verkið Munnthurkusafn. Tað vóru broderaðir serviettar, also brúktir skitnir serviettar, sum broderí. Ja ikki sjálvur servietturin, listarfólkið hevði boðið fólkið til døgurða og samlaði serviettarnar saman aftaná til tess at brúka sum motiv í verkinum.

Serviettasavnið eftir Annu Andreu Winther

Loji Høskuldsson

Kjarval: Seyðabóndin

Í Neskirkju var ein framsýning við málningum hjá Thrándi Thórarinsson. Hansara motiv var Hólavallakirkjugarður, tann gamli kirkjugarðurin í Reykjavík. Minti eitt sindur um Spoon River Anthology. Tey deyðu sita á síni egnu grøv og práta. Tann fyrst jarðaði í kirkjugarðinum tekur íóti teimum, sum koma seinni. Bókmentatilsipingar vóru eisini, persónar hjá Laxness vóru í kirkjugarðinum. Vit fóru so aftaná ein túr í kirkjugarðin sjálvan.

Søvn

Tætt við  Hólmavík var eitt seyðamuseum, stuttligt hugskot. Ikki so forkunnugt hjá okkum, sum vit nógv um seyð frammanundan.

Og í  Hólmavík er eitt gandamuseum, har fært tú innlit í fólksliga trúgv og pátrúgv. Nógv um gandakallar, sum blivu brendir á báli og annað óhugnaligt.

Í Simbahøll  á Thingeyri var framsýning hjá  Guðbjørg Lind Jónsdóttir. Tað vóru kakuformar, sum hingu á bróstinum.

Á Mokka á Skólavørðustíg var sýning hjá Jóni Magnússon.

Hetta var ein partur av Íslandsferðini við TOYOTA RAV4 4x4 - Hybrid- 2022

Island - Drangsnes 5

Guðný hjá Ingu Rósu hevur búð og arbeitt á Drangsnesi í tvey ár. Nú fer hon at flyta aftur til Reykjavíkar, so um vit vildu vitja hana á Drangsnesi, so var tað nú....og nú varð tað. Guðný hevur nú í summar sín hálvvaksna son og beiggja sín hjá sær, teir arbeiða í "Ung í arbeiði". Guðný hevur eini deilig hús har í bygdini. Bygdin er lítil, men har er fiskavirki, handil og svimjihylur og so skúli sjálvandi, har Guðný arbeiðir sum skúlastjóri og lærari. Men Guðný er eisini listarfólk, og inni hjá henni er ikki sum í einum miðalheimi. Har eru listarverk og hálv listarverk og byrjandi listarverk og hugsaðar hugmyndir alla staðni. Hennara yndis miðil er leirur, og tað var áhugavert at síggja hennara privata "leverandør". 

Guðný og mostrarnar

Gvendarlaug hins heilaga

Leirnámið

Gvendarlaug er halgibrunnur, sum ber navn sítt av Gudmundi bispi, og har ið lekidómur fekst.

Guðný koyrdi okkum eisini túr til Hólmavíkar, sum er teirra "høvuðsstaður".  Hagar fara børnini til ítróttarkappingar, har er banki og so framvegis. 

Útsýnið út á flógvan er gott allastaðni í Dranfsey, bæði heimanífrá GUðný og úr pottunum í fjøruni.

Ísland - Heydalur 4

 Tá ið vit fóru úr Ísafirði á Skutulsfirði, vóru hesir firðir eftir at vitja: Áftafjørður, Seyðisfjørður, Hestfjørður, Skøtufjørður, Mjóifjørður, Ísafjørður, Steingrímsfjørður.

18. juni er føðingardagur Ingu Rósu, og Jóna og Dommi høvdu ikki gloymt hana, men góvu bæði klemm og gávu. Og Turið bjóðaði døgurða um kvøldið í Heydali. Vit vitjaðu kaffihúsið Lítlabæ í Skøtufirði, so sera hugnaligt í gomlum sethúsum, vanlig stova og vanligur køkur, so autentiskt. Vit fantaseraðu um, at slíkt kundi verið í Hoygarðinum við Gjógv ella í Putlhúsi í Dali.

Dagsins koyring førdi okkum eisini til Súðavíkar, har ið vit sóu minnismerki um tey, sum doyðu í skalvalopinum . Ì Súðavík eru nú tvær bygdir, tann gamla bygdin og so tann nýggja bygdin longur inni á firðinum.

Heydalur var eitt tað besta gististaðið á øllum túrinum, har var eingin bygd, men ein stórur garður, sum var gjørdur til gistingarhús. Matstova og móttøka var í hoyggjhúsinum, og kømur vóru ymsastaðni, ivaleyst bygd afturat. Svimjihylur var í einum vakstrarhúsið og heitir pottar uttanfyri. Og dalurin var so vakur, áin Heydalsá var so stór og frísklig. Vit gingu túr inn í Dalin, tað var kalt. Vit vóru 2 nætur í Heydali, síðan gekk leiðin yvir Steingrímsfjarðarheiði til Guðný á Drangsnesi.