PAKKAÐ VIKUSKIFTI

Fyrst var at fara í útvarpið at biðja fólk læna studentaskúlanum myndir, so fór eg suður at reiða upp í Putlhúsi, tí at har skuldu koma veitslugestir til Turiðsa stóra dag. So fór eg at arbeiða við stílum og pensumuppgevingum og Parísskrá og so var tíð at fara í ball, og í morgun norður aftur at fylgja Kartna til gravar. Nógv fólk var í kirkjuni og á Hafnia aftaná. Tú sær øll hesi gomlu havnarfólkini , sum koma at fylgja sínum gamla vini ella felaga til gravar. Nógv eru sera gomul, so at prestur veit, at stórur partur av samkomuni verða viðskiftafólk hansara um stutta tíð. Prestur Uni Næs helt eina góða talu, dugdi at flætta sálmarnar og bíbliuorðið saman við manninum. Hann las um mansins - menniskjans - aldur sum er 70 ár, og 80 um ein er ein sersterkur kappi. Kartni var 98, og nú er Dagmar vorðin einkja 100 ára gomul. Tað var vakurt at síggja barnabørnini og langabbabørnini í dag. Andreas og Mads Ellindur stóðu og grundaðu og tonktu, meðan teir hugdu niður í grøvina og fylgdu við, meðan prestur kastaði jørð á. Á Hafnia skonktu tey genevur, Kartni hevði sjálvur ornað tað, tað stóð klárt í einum kassa við áskriftini ERVI. Ordan í tingunum. Tíverri blivu ikki stundir at fara at heilsa upp á Anton sum skuldi fáa gávugóðs í dag. Hann er gamal næmingur hjá mær, og eg ynski honum hjartaliga tillukku! Og í morginári er tað so innflyting í Eiriksgøtu.

A court hearing

 

Í dag havi eg havt besta tíma ársins. Ein fyrsti flokkur hevur lisið Animal Farm hjá George Orwell. Vit hava tosað um innihaldið, um persónarnar, eitt sindur um stalinismu. Vit hava havt sokallað kreativt bólkaarbeiði, onkur gjørdi ein lítlan leik, onkur ein sang og pressubólkurin skrivaði eina grein um kollveltingina á garðinum. Vit endaðu í dag við einum rættarfundi. Tey fyrireikaðu hann mánadagin, sjálvsagt alt á enskum.

Høvuðsbrotsmaðurin er gølturin Napoleon, og hann var tann fyrsti á ákærubeinkinum, og hann var sera sannførandi. Hansara hjálparar Squealer og hundarnir blivu eisini spurdir. Vit høvdu tvey sakføraratoymi, og eina rúgvu av vitnum. Ryssan Clover, seyðirnir, hønurnar og eslið Benjamin vóru virni hjá ákæranum. Sum fundurin leið vísti tað seg, at verjutoymið var hárhvast í sínum spurningum, men ákæruvaldið ikki nóg væl fekk fram í ljósið tey hópdráp, sum eru farin fram á garðinum, og at Napoleon sostatt er ein hópdrápsgrísur. Og Squealer og Mr. Whimper vóru mega stuðlar hjá Napoleon. Ein glotti var,, at hundarnir greiddu frá, at drápini veruliga fóru fram. Judge Bergljót tók samanum og mátti lata hópdrápsgrísin leysan. Av tí at fotoforboð er í rættarsalinum hevði pressan ein teknara við, sum so teknaði scenariið, myndin sæst niðanfyri.

Tey eru 24 næmingar, so vit høvdu ein langan rollulista. 11x er ein fínur flokkur, við uppá alt og ger sítt arbeiði, so tey eru undantak frá hinum ónøgda skúlablogginum hin dagin .

What can a girl do?

Ein ótrúlig søga

Eg gekk túr, gekk í mínum egnu tonkum. So kom eg á eitt pláss við so ótrúliga vøkrum útsýni, tað var tætt við Havnina, á hoyvíkarleiðini. Eg var í einum túni, nú kemur ein maður til mín og býður mær inn. Tað er ein ungur myrkhærdur maður, ókliptur, nokso tjúkkur. Jú eg vil gjarna hava eitt glas av vatni. Inni er øgiliga óruddiligt, eg spyrji, um hann selur antikvitetir, ja sigur hann, men skjótt varnist eg, at alt húsið er soleiðis – sum ein antikvitetshandil. Ná, vit seta okkum í eina antikka sofu. So við og við fái eg eina kenslu av, at hesin maðurin er ikki heilt sum hann skal, hann tosar svart, og hann leggur ann uppá meg, sjálvt um eg kundi verið omma hansara, hann sigur mær, at hann er 22 ár.  Nú hoyri eg eina barnarødd og vendi mær við, har er ein smágenta eini 6 ár, hon er kløn og kritahvít, eg vendi mær ímóti manninum á sofuni, men hann er ikki har. Tá ið eg síggi hina bleiku smágentuna veit eg, at hetta er ein afturgonga. Eg havi ikki verið so sperd í lívinum, reisi meg upp og skal fara. Á veg út møti eg gentuni aftur, tað er sama genta, men nú er hon eini 14 ár. Nú er maðurin aftur har og  vil forða mær at fara, eg eri nú sannførd um, at tað er hann sum hevur dripið hesa gentuna, sum gongur aftur. Eg sigi honum, at eg má fara, hann rættir hondina út: 100 krónur sigur hann, eg fari í lumman eftir 100 krónum, tí eg vil bara burtur. So sigur hann “eisini urið”…..tá vaknaði eg.

Nýggir næmingar krevja nýggjar lærarar

Zapparagenatión, curling børn – tey hava mong nøvn. Tey hava eisini foreldur, foreldrini eru fødd uml. 1968, vaksin upp við, at alt skal bera til, og tú kanst fáa stuðul til alt, eisini til góðan karakter og góða útbúgving. So far so good, men tað er tá ið tú skalt hava alt hetta og IKKI gera nakað arbeiði sjálv, og tá ið tú skalt hava sama rætt og vald og annað sum lærarin, tað er tá ketan slitnar. Lærarin eitur lærari, tí at hon skal LÆRA næmingarnar, ikki vera teirra javnlíki. Vit hava sæð og síggja hvønn dag dømi um, at næmingar hava so stórt sjálvsálit og slíka turkatrúgv upp á seg sjálv og síni foreldur, at lærarin verður óneyðugur - við kærum og klagum (sum ofta fáa viðhald) seta tey sínar egnu reglur. Virðing og disiplin eru tveir býir í Russlandi, har eingin býr. Bæði millum foreldur og næmingar. Sjálvandi skal eitt lærarafólk arbeið so, at tað hevur virðing uppiborna.

Verkfalsfundur

Pedagogfelagið hevur gjørt eitt stórt fyrireikingararbeiði, við plakatum og faldarum og eini góðari fundarskrá. Eg hoyrdi ikki alt, men eg hoyrdi forkvinnuna, hon helt eina greiða røðu, sum greiddi frá málinum. Næsti maður á pallin var Johan í Kollafirði. Tað undraði meg, at hann brúkti næstan alla talutíðina til at seta kílar ímillum pedagogar og lærarar, eg haldi ikki tað er so snilt at finna sær mótstøðumenn millum aðrar pedagogar, tá ið mótstøðan í fíggjarmálaráðnum er kjarnin í málinum. Johan sang eisini tveir sangir. Onnur vóru eisini á pallinum, m.a. Rigmor Dam, sum sló á nakrar feministiskar streingir. Krúllan, sum manglar í sáttmálanum er vorðið eitt sýmbol, sum tað sæst á myndini. Lisa í Dali sang eisini tveir sangir.

Rættiliga nógv fólk var á Vaglinum, fleiri fakfelagsleiðarar, Heðin Mortensen og aðrir býráðslimir vóru eisini at síggja.

 

Jóhannes mammubeiggi

Stjórnin á háskúlanum hevur tikið eitt tak. Tey skipa fyri fyrilestrakvøldum um undangongumenn. Tann fyrsti var um Jóhannes av Skarði. Trý fólk hildu ein stuttan fyrilestur um ymsar tættir í Jóhannesar virki, Johan H. W. Poulsen, Jógvan Ravnsfjall og Turið Sigurðardóttir: málmannin, granskaran og týðaran. Góður máti at gera tað uppá, so gott hjá áhoyraranum at lurta eftir ymsum helsur enn eftir einum longum. Fitt av fólki var samankomið, eisini hóast Norrøna felagið hevði eitt tiltak í NLH sama kvøld.

 

Eitt kvøld verður aftur hildið 27. feb., tá verður høvuðspersónurin Jóannes Rasmussen (Mús) og triðja kvøldið verður 19. mars, tá heldur Hans Holm fyrilestur um ANC, felagsskapin hjá Nelson Mandela í Suðurafrika.