Bókastev í Keypmannahavn 7-12 okt. 24

 Lesibólkurin Bókastev gjørdi eina mentanarferð til Keypmannahavnar. Vit vóru seks konur, sum løgdu avstað. 

Ásvør, Marjun, Turið, Bergljót S, Malena, Bergljót M
Á flogvøllinum, so spentar at fara. Birgit Remmel tók myndina.

Vit gistu á Wakeup í Borgergade. Tað er frálíka sentralt, gott pláss í forhøllini og í matarhøllini. Kømrini eru smá, og dekan ov smá til 2 fólk. 

Fyrsta dagin fóru vit ein deiligan túr gjøgnum Kongsins urtagarð á veg til den Hirschsprungske samling. Har var ein serframsýning við Nýbrotsins kvinnum, sera áhugavert. Kvinnurnar vóru nógvar í tali og vildu vera listarkvinnur. Tað etableraða listarumhvørvið vildi ikki sleppa teimum upp í part. Well, what else is new?? Sama sýning var á Ordrupgaard í vár, tá vóru eg og Lisa har saman. (sí blogg frá 29. mai í ár...Vitjað listasøvn og onnur søvn). Og næsta stopp er Skovgaard savnið í Viborg.

Í kongens have

Eg festi meg serstakliga við Berthu Wegmann (1847-1926). Hon var nógv í París og í Týsklandi, og var viðurkend sum ein av teimum bestu portrettmálarunum. Kortini verður hon tagd burtur í listasøguni í Danmark Tá ið teir endiliga nevna hana, so siga teir, at hon hoyrir til tann týska skúlan, er ávirkað av útlendskum ráki, og at forrestin er hon fødd í Sveis (halloo hon flutti til Danmarkar 5 ára gomul og fekk sína fyrstu listaútbúgving í Danmark). 

Bertha Wegmann: Ung genta 1885

Tær síggja móðar, keddar, útkoyrdar út

Men tað er einki mótt ella útkoyrt yvir Strindberg, har hann hevur stillað seg upp. Listarkvinnan mátti gjøgnum eina trupla roynd, til at fáa loyvi ar mála tíðarinnar stóra.

eftir Sofie Holten

Amalia Skram

Í kirkjuni

Í kirkjuni

Hugsaði um kirkjugangararnar í Fiskimonnunum hjá Hans Kirk, álvarsfullir og stúrnir.

Allar dagarnar fingu vit tíð at hvíla okkum mitt á deg, so tað skuldi ikki verða ov strævið. Tað fyrsta kvøldið fóru vit í Skuespilhuset og sóu Ett drømspel hjá August Strindberg. Tað var stórt. Vit hava lisið verkið rættiliga væl, so vit fingu væl fylgt við. Pallurin var ein niðurlagdur fótbóltsvøllur, hann mól og fólkini mólu við ella runnu ímóti meldrinum. Sakførarin og gudadóttirin høvdu eina lítla íbúð, hon kom undan loftinum og hvarv upp aftur, tá ið tann myndin var liðug. Sjáldsamt var , at tveir balettdansarar vóru við, og ein av sjónleikarunum var koyristólsbrúkari. 

Annan dagin fóru vit í Davids samling fyrrapart og at vitja Sólrun seinnapart. 

Sera flott hús, sum hýsa savninum við islamskari list.

Vit fingu høvi at heilsa upp á familju eisini , nú ið vit vóru farnar so langa leið :

Marius og langomman

Marjun og systkinabarnið Hjørdis

Ásvør við ommudóttur

Ásvør og Finnur

Til kaffi í Nyhavn

Triðja dagin vóru vit á Arbeiðarasavninum í Rømersgade og um kvøldið til konsert í DR koncertsal. 

Tað var eitt stórt upplivilsi at síggja tað flotta konserthúsið, sum Jean Nouvel hevur teknað. Ikki ein slættur veggur, ella bróst. Men bylgjandi træ, og kubbar og spennandi linjur alla staðni. Fantastiskur tónleikur og pianisturin Martin Helmchen og dirigentur var Kerem Hasan. 

Blátt hús og reyður viður innan, stórbært.

Seinasta dagin var so Louisiana á skránni, vit vóru hepnar at  Laura hjá Bergljót M kom við, tí hon koyrdi okkum frá og til støðina í Humlebæk.. Serframsýningin Havið læt júst upp henda dagin (11. okt), tað var ein flott sýning, sum við ymsum tøkni og huglag vísti ymsar síður av okkara alra havi. Har fingu vit okkum miðmála, og vit vóru átta, tí at Finnur hjá Ásvør og Laura vóru við. 

taramynd eftir Emilija Skarulyté

Anselm Kiefer: Inflammation 

fast fish loose fish

Takk fyri ein góðan túr. Laura er eisini á myndini.

Reykjavík august 2024

 Vit fóru at vitja Ingu Rósu. Tað var ein herliga friðarlig og rólig vika. Inga Rósa var so blíð og hjartagóð vertskona., og Guðny er góður bilstjóri

Altíð deiligt at vitja á Neshaga

Vit  sóu sjónleikin "Orð gegn orði", tað er ein einkvinnuleikur um ein sakførara. Fyrri partur er um hennara arbeiði sum sakførari, har hon ofta noyðist at vera hørð ímóti offrum, tá ið hon skal verja tann ákærda. Seinni partur var um hana sum neyðtøkuoffur, eisini í rættinum. Hon fekk onga náði. Tað var eyðmýkjandi og hart. Sera góður leikur, sum gróv rættiliga djúpt.

týðing Ragnar Jónasson

Vit sóu tveir nýggjar íslendskar filmar: Ljóðbrot og Snerting

Tann fyrri er um ungfólk, sum skula sætta seg við sorgina, tá ið vinur teirra doyr. Tann seinni er ein romantiskur filmur um gamlan mann, sum fer til Japan at leita eftir ungdómskerastu.

Ljóðbrot

Og so fóru vit á ymsi listasøvn, vit vóru á Kjarvalsstøðum, Safnahúsinum, Listasavni Íslands.Men vit vóru eisni á bókasavninum á Seltjarnarnesi, har ið Guðny og tvær aðrar høvdu framsýning. Stuttlig ung listarverk. 

Hann heldur eyga við teimum

við tvátthylin 1931

Við Savnshúsið

TinTin á Akuroyri framman fyri eyðkendu kirkjuni

 

Hesa myndina tók Súsan, sum vit møttu har á Kjarvalsstøðum. Tíverri tók eg onga av henni.

Á Seltjarnarnesi var modernað list hjá trimum ungum kvinnum, ein teirra Guðny hjá Ingu Rósu. 

Føðingarstólurin, í høghælaðum

Ótrúligt, at eitt heilt menniskja sleppur út.

Turið og Inga Rósa við taramynd hjá Guðny

Vit vóru onga langa útferð hesa ferð. Men tað var nokso langt at fara til Frelsunnarherin. Tey hava fingið nýggj hús, sum eg havi ætlað mær at sæð, og tað lukkaðist. Sera flott. Og tey gera fjølbroytt hjálpararbeiði har.

Vit fingu eisini høvi at vitja okkara góða vin Thorvald, altíð deiligt at dagføra hvønn annan um familju og arbeiði.

Turið skoðar eitt av seinasty avrikunum hjá Thorvaldi.

I Champagne august 2024

 Eg fylgdist við Turið og Halli og Magnu og Kristinu. Vit flugu til París ein mánadag og komu aftur eina viku seinni. Hetta var meðan olympisku leikirnir vóru í París, ja og í Lille. Tey fóru til ein hondbóltsdyst, og hann var í Lille, tað var ein langur koyritúrur.

Øll hjá FS vóru har, men tey ungu fóru heim nakað skjótt, og Michel fór til arbeiðis. 

Louis og Cloé

Emil

Frida Sofía hevur summarbústað í Oyes í Champagne, tað er eystanfyri París. Húsini er ein gamal bóndagarður. Tey hava moderniserað okkurt, men sum heild er tann gamli dámurin væl varðveittur. Um húsini er ein stórur urtagarður við frukttrøum og stórum vølli, og tey hava fingið sær svimjihyl. 

Veðrið var gott alla tíðina, uml. 20-25 stig. Genturnar Madeleine, Magna og Kristina vóru í hylinum hvønn dag. Tey vóru súkklutúr, og eg og børnini vóru gongutúr. 

Eg sat mest í skugga, har tað var frálíka passaliga heitt.

Vit vóru ein túr í Reims, skoðaðu dómkirkjuna og hugdu at hondbólti í einari sportsbarr. Holm Johannesen familja fór til rundvísing og skeið á eini sjokolátaverksmiðju.

Og ein dag vóru vit á loppumarknað í Boissy-le-Repos. Har kostar næstan alt 1 evru.

Tann mánadagin, vit komu heim, kom stormur um kvøldið, og flogferðslan órógvað. Men vit lendu tíðliga og vórðu ikki ávirkað.

Nýtt knæ, enn einaferð

Mítt vinstra knæ er frá 2014, og nú 10. juni 2024 fekk eg nýtt høgraknæ. Tað var ein góð føðingardagsgáva at fáa. Á Landssjúkrahúsinum boða tey fyrst til kunnandi fund, og Gerda greiddi frá, hvussu knæið sær út.

Eg varð innløgd í tann nýggja partin av LS, tey sóu beinan veg í pappírunum, at konan hevði jú føðingardag, so flagg kom á borðið. Men veggjarprýðið inni á tí fínu einastovuni var so syrgiligt at hyggja at, tveir litleysir fýrkantar

Tá ið skurðviðgerðin var av, kom fysioterapeutur  at fáa meg upp úr seingini , og Lo and behold! eg fekk slett ikki ilt og hugsaði, hetta var einki fyri. Men eg skuldi fáa annað at síggja! Má rósa teimum á LS fyri teirra perfektu pínuviðgerð..

Næsta stopp var Hvíldarheimið Naina. Har var eg eisini seinast. Og eg hugsi, at er tað nakrastaðni ella nakrantíð , at orðið RETRO hóskar, so er tað á NAINU. Har er gott at vera, friður og greiðar reglur, reglur um, nær tú etur, og hvar tú situr og gongur.  Og  retro hús og møblar og prýði, retro reglur, retro vasking, enntá retro matur. Men veggjarprýði (Torbjørn Olsen, Hansina Iversen, Ingálvur) var avgjørt ikki bara retro. Sera fitt og hjálpsamt starvfólk, sum hevði ein góðan koordinerandi leiklut. Vit fingu venjing í boði á LS 8 ferðir, 2 ferðir um vikuna. Tað var gott at kunna fara hagar í felag.

Á NAINU fekk eg vitjan, og tað er so hugaligt.

Vit styttu okkum stundir við at binda og hyggja ar EM í fótbólti.

Og ikki at gloyma umhvørvið í Gundadali, stuttan ella langan túr, viðarlundin tekur ímóti tær við opnum ørmum. 

VENJING

Á LS er ein knæ/mjadnar skúli. Tað var sosialt gevandi at hitta onnur í somu støðu og meta seg ímóti. Venjingar á gólvi, stóli, briks og súkklu. Tað er pínufult at skula liða eitt nýskorið knæ, men við eggjan og góðum orðum fekk mann nøkulunda gjørt venjingarnar. Sólfríð og Gerda eru góðir hóvligir lærarar. Tú kanst spyrja tær um alt, og tær hava gott tol. Takk.

Gerda og Sólfríð